محمد حامد الوتاند ستاکتن کلیفورنیا

په سویدن کې د افغان علمي او فرهنګي ټولنې ټولو درنو غړو ، مشرتابه او افغان ستور مزلي ښاغلي عبدالاحد مؤمند ته خپلې نېکې هيلې او د زړه له کومې درناوۍ وړاندې کوم . لمړۍ اجازه راکړۍ چې دځان او د امریکا د کلیفورنیا په ایالت کې د لوی افغان د ټولنې د ټولو غړو او مشرتابه له لوري د افغان اتل او ستور مزلي ښاغلي عبدالاحد مؤمند په درنښت غونډه کې ټولو ګډونوالو ته هرکلۍ او درناوۍ در وړاندې کړم ، همداسې په سویدن کې د افغان علمي او فرهنګي ټولنې ټولو درنو غړو ، مشرتابه نه تر مخه مننه او خوښنه چې د داسې یو غوره نوښت په لاره اچولو سره یې د تل یادي عبدالاحد مؤمند په ویاړ دا درنه غونډه رابللې ده .ښاغلو او آغلو : د افغان ستور مزلي ښاغلي عبدالاحد مؤمند په اړه کولاې شم ډېر څه وليکم او وواېم . خو پدې پوهېږم جې پدې درنه غونډه کې به ګډونوال د دوې په اړه ډېر څه وه واېي او تاسې ته به یې وړاندې کړي.خو زه به د دوې په ویاړ په خپل یؤ شعر بسنه وکړم چې هيله مند یم د ښاغلي عبدالاحد مؤمند او ستاسې ټولو د منلو وړ وګرځي .

 په درناوۍ
 

ویاړ

د مؤمندو افغانانو یې اتل
ویاړ پر تا ده ای احده تل تر تل
زما یاد شي ستا مدار نه بېلیدل
هغه پورته آسمانو ته ستا ختل
هم را یاد شي هغه وخت هغه کابل
ستا خوله ډکه له مسکا او خندېدل
هغه بڼ هغه طوطي هغه بلبل
د فضأ نه په پښتو ستا غږېدل
ویاړ پر تا ده ای احده تل تر تل
ګاونډیو کې د صیال نشته ستا بل
په تهران او په لاهور او په زابل
که ترکۍ که اېرانۍ دې که مغل
خپلو غلو نه راته جوړ کاندي اتل
ویاړ پر تا ده ای احده تل تر تل
ته چې پاس وې په حسرت دوئ څوځېدل
چې افغان کاندي فضأ ته اوس ختل
ځېنې ،ځېنې به له قهره خوټېدل
چې په مونږ کې او پېدا شو ستور مزل
ویاړ پر تا ده ای احده تل تر تل
کاشکې زده کړو مونږ د یؤ او بل زغمل
بل نظر ته درناوۍ او هم منل
قدر ،فخر ،درناوۍ او یادول
د مشرانو پښتنو خپل نازول
ویاړ پر تا ده ای احده تل تر تل
خدایه ویښ کړې دا خټک ،مؤمند ، کاکړ
علم او پوهه کې شې ته ورسره مل
هم پر ځمکه پر آسمان د ژوندون چل
لر او بر کړې هوا باز او ستور مزل
دا چې خوښ یې عقابان د خپل وطن دي
الوتاند هم کله کړي الوتل
محمد حامد الوتاند ستاکتن کلیفورنیا
د ۲۰۱۱ع کال د سمبر د میاشتې ۲۵مه

Conctact پته :- Salgayweb@gmail.com